اسلام آباد میں عالمی معیار کا جِم اور رہائش ۔۔۔۔پی ٹی ایف نے تاریخ رقم کر دی
لاہور(نوائے درویش رپورٹ) پاکستان ٹینس فیڈریشن (پی ٹی ایف) نے کھلاڑیوں کو عالمی معیار کی سہولیات فراہم کرنے کے لیے ایک اہم قدم اٹھایا ہے۔ اسلام آباد کے دلاور عباس ٹینس کمپلیکس میں جدید ترین جِم، معیاری کیفے ٹیریا اور بیرونِ شہر سے آنے والے کھلاڑیوں کے لیے اعلیٰ معیار کی رہائشی سہولتیں فراہم کی گئی ہیں۔
پی ٹی ایف کے سینئر نائب صدر خواجہ سہیل افتخار کے مطابق، یہ منصوبہ پی ٹی ایف کے صدر اعصام الحق قریشی کی قیادت میں مکمل کیا گیا، جسے ٹینس کے قومی اور بین الاقوامی حلقوں میں زبردست پذیرائی ملی ہے۔ انہوں نے کہا کہ یہ پیش رفت پاکستان میں ٹینس کے انفراسٹرکچر کو جدید خطوط پر استوار کرنے کی علامت ہے۔
جدید جِم اور رہائشی سہولتیں1,500 مربع فٹ پر محیط جدید ترین جِم میں لیگ پریس، لیگ کرل، لیگ ایکسٹینشن، کیبل کراس، اور اسپن بائیکس سمیت جدید فٹنس مشینیں نصب کی گئی ہیں۔ ان سہولیات کا مقصد کھلاڑیوں کی جسمانی مضبوطی اور کارکردگی میں بہتری لانا ہے۔
بیرونِ شہر سے آنے والے کھلاڑیوں کے لیے معیاری رہائش فراہم کی گئی ہے، جہاں مرد کھلاڑیوں کے لیے 10 اور خواتین کھلاڑیوں کے لیے 3 خصوصی کمرے مختص کیے گئے ہیں۔ ان اقدامات سے کھلاڑیوں کو آرام دہ ماحول اور بہترین سہولتیں دستیاب ہوں گی۔
بین الاقوامی کوچز کی خدماتپی ٹی ایف کے صدر اعصام الحق قریشی نے اپنی ذاتی روابط کو بروئے کار لاتے ہوئے بین الاقوامی شہرت یافتہ کوچ اور ٹرینر رابرٹ ڈیوِس (امریکہ) اور سربیائی فٹنس ماہر لالووچ کی خدمات حاصل کیں۔ ان ماہرین نے دلاور عباس ٹینس کمپلیکس میں دو ہفتوں پر مشتمل خصوصی تربیتی سیشنز منعقد کیے، جن سے نوجوان کھلاڑیوں کو بے پناہ فائدہ پہنچا۔
گراس روٹس سطح پر ٹینس کے فروغ کی امیدخواجہ سہیل افتخار نے ان اقدامات کو پاکستان میں گراس روٹس سطح پر ٹینس کے فروغ کی جانب ایک شاندار قدم قرار دیا۔ انہوں نے امید ظاہر کی کہ ان ترقیاتی اقدامات سے نیا ٹیلنٹ ابھر کر سامنے آئے گا اور پاکستانی کھلاڑی بین الاقوامی سطح پر بہتر کارکردگی کا مظاہرہ کر سکیں گے۔
No comments:
Post a Comment