لاہورسیاسی ملاقاتوں کامرکز۔۔۔۔۔کیا23 دسبر سے پہلے کوئی نیا سرپرائز سامنے آسکتا ہے؟

لاہور اس وقت سیاسی ملاقاتوں کا مرکز بنا ہوا ہے۔ سیاسی پارہ ہائی ہے ۔ پی ٹی آئی چیئرمین عمران خان نے کے پی اور پنجاب اسمبلی کی تحلیل کے لئے23 دسمبر کی تاریخ دی ہوئی ہے۔ ا سکے بعد سے حکمران اتحاد میں کھلبلی مچی ہوئی ہے اور وزیر اعظم شہباز شریف اتحادیوںکے ساتھ مل کر اسمبلیوں کی تحلیل کوبچانے کے لئے سرگرم ہیںاور ن لیگی رہنمائوں کے ساتھ ملاقاتیںکررہےہیں۔اس سلسلے میںشہباز شریف کی چودھری شجاعت سے ملاقات ہوئی ہے۔آئندہ48گھنٹے انتہائی اہم قرار دئے جارہے ہیں۔24 گھنٹے میں شہباز شریف کی شجاعت سے دو ملاقاتیں ہوئی تھیں۔ اس طرح پنجاب کی سیاست میںایک بار پھر چودھری برادارن اہمیت اختیار کرگئے ہیں او ر خاص طور پر نظریں چودھری پرویز الٰہی کی طرف لگی ہوئی ہیں۔ ـحکمران اتحاد اور عمران خان دونوں کے لئےچودھری پرویز الٰہی بہت زیادہ اہم ہیں۔

چودھری شجاعت نے پرویز الٰہی سے اسمبلیوں کی تحلیل کے حوالے سے بات کرنے کا عندیہ دیاتھا ۔وزیر اعظم میاںشہبا ز شریف آصف زرداری سے بھی رابطے میںہیں اور گیم چینجر آصف زرداری نے شہباز شریف کو ویٹ اینڈ سی کا کہا ہے۔ آصف زرداری نے بھی لاہور میں پارٹی کے پارلیمانی لیڈروںسے ملاقات کی اور اسمبلیوں کی تحلیل کو روکنے کےلئےباقاعدہ مشاورت کی ہے۔چودھری شجاعت حسین کا کہنا تھا کہ اگلے تین سے چار روز تک سیاسی رابطے اور ملاقاتیں جاری رہیں گے۔ پنجاب کے معاملے پر ٹینشن زیادہ بنی ہے لیکن جلد حل نکل آئے گا۔ان کاکہنا تھا کہ چیئرمین پی ٹی آئی عمران خان عقلمند آدمی ہیں، انہیں کسی مشورے کی ضرورت نہیں ہے۔

میاں شہباز شریف نے بھی پارٹی رہنمائوں کا خصوصی اجلاس طلب کرکے مشاورت کی تھی ۔ن لیگ کے اجلاس میں یہ بھی فیصلہ کیاگیا ہے کہ گورنر کے ذریعے وزیر اعلی پنجاب کو اعتماد کاووٹ لانے کاکہاجائے گا اوراس کے علاوہ مزید آپشن پربھی غور کیاجائے گا۔ وزیراعلیٰ پنجاب کےخلاف اعتماد کے ووٹ کے لیے گورنر کو باقاعدہ تحریری درخواست جمع کرانے کے آپشن پر اتفاق کیاگیاہے۔

وزیر اعظم شہباز شریف سے مشیر سیاحت و کھیل عون چودھری کی ملاقات ہوئی تھی،اس ملاقات میں ملکی معاملات، پنجا ب کی سیاسی صورتحال اور محکمانہ امور پر بات چیت کی گئی۔عون چودھری نے جہانگیر ترین کا خصوصی پیغام وزیر اعظم شہباز شریف کو پہنچایاتھا۔ن لیگ کی قانونی ٹیم نے اعتماد کے ووٹ کی آپشن پر جانے کا مشورہ دیاہے۔اجلاس میں اعتماد کے ووٹ کے لیے گورنر پنجاب کو تحریری درخواست جمع کرانے کے آپشن پر اتفاق کیا گیا ہے۔ن لیگ نے اراکین پنجاب اسمبلی اور آزاد اراکین کو لاہور پہنچنے کی ہدایت کی ہے تاکہ مستقبل کے حوالے سے لائحہ عمل تیار کیاجائے۔ق لیگ سے بھی رابطوں کا ٹاسک چودھری شجاعت حسین کو دینے پر اتفاق ہوا ہے۔آصف زرداری نے پی ٹی آئی کے ناراض اراکین سے رابطوں کا عندیہ دیا ۔

شہباز شریف نے عمران خان کے کیسز میں تیزی لانے کی ہدایت کی،حکومت کی طرف سے اسحاق ڈار صدر مملکت عارف علوی سے باقاعدہ ملاقاتیںکرکے ان کو صورتحال اور تمام آپشنز کے بارے میں باقاعدہ آگاہ کررہے ہیں ۔صدر مملکت اسحاق ڈار کوجبکہ وزیر خزانہ نے عارف علوی کوحکومتی اتحادکے متعلق مسلسل بریف کررہے ہیں۔ اسحاق ڈار کاکہنا ہے اسمبلیاں تحلیل ہوتی ہیں تو 90 روز کے اندر انتخابات ہو سکتے ہیں اور حکومت کا کام فنڈز جاری کرنا ہے انتخابات کرانا نہیں تاہم آئندہ انتخابات مردم شماری کے بعد ہی ہوں گے جس کے لیے حکومت فنڈز جاری کر چکی ہے۔ جب بھی الیکشن ہوں گے ہم تیار ہیں اور امید ہے کہ ہمیں الیکشن میں کامیابی ملے گی۔ چیف الیکشن کمشنر اپنا آئینی کردار ادا کریں گے اور انتخابات کی تاریخ کا فیصلہ الیکشن کمیشن نے ہی کرنا ہے۔ الیکشن کمیشن انتخابات کا اعلان کرے گا تو ہم بھی تیار ہیں۔

پرویز الٰہی نے گذشتہ روز ایسا بیان دیاتھا جس سے یہ تاثر ہوا تھاکہ پی ٹی آئی اور ق لیگ کے درمیان واضح اختلاف ہے۔چودھری پرویز الٰہی کا کہنا تھا کہ جب عمران خان جنرل (ر)قمرجاوید باجوہ کے خلاف بات کر رہے تھے تو مجھے بہت برا لگا،ان کا کہنا تھاکہ جنرل(ر) قمر جاوید باجوہ ہمارے محسن ہیں، محسنوں کے خلاف بات نہیں کرنی چاہیے، ان کے ہم پر بہت احسانات ہیں، احسان فراموشی نہ کی جائے۔ان کاکہنا تھاکہ جنرل(ر) باجوہ کے خلاف اب اگر بات کی گئی تو سب سے پہلےمیں بولوں گا، میری ساری پارٹی بولے گی، ہم عمران خان اور پی ٹی آئی کے مخالف نہیں ساتھی ہیں لیکن اپنے محسنوں کو فراموش نہیں کر سکتے۔

اس بیان کے بعد پنجاب کی صورتحال میںتبدیلی آئی ۔ تاہم مونس الٰہی نے عمران خان کو چودھری پرویز الٰہی کے موقف کی وضاحت کی اور کافی دیر تک ملاقات کی۔ اس کے بعد اب پی ٹی آئی نے ق لیگ کے ساتھ سیٹ ایڈجسٹمنٹ کے لئے کمیٹی بنادی ہے۔ یہ کمیٹی باقاعدہ اجلاس کے بعد رپورٹ چیئرمین عمران خان کوپیش کرے گی اور یہ بتائے گی کی سیٹ ایڈجسٹمنٹ کے حوالے سے کیا فیصلہ ہوا ہے۔ چیئرمین پی ٹی آئی عمران خان کاکہنا ہے ق لیگ اور تحریک انصاف کا موقف الگ ہو سکتا ہے لیکن ق لیگ کے ساتھ مل کر الیکشن میں اتریں گے۔انہوںنےپی ٹی آئی اراکین کو ہدایت دی ہے کہ تحریک انصاف کی قیادت ق لیگ کے ساتھ نہ الجھے، پاکستان تحریک انصاف اپنے بیانیے میں کوئی تبدیلی نہیں لائے گی۔

الیکشن کمیشن آف پاکستان نے کہا ہے اسمبلی تحلیل ہوئی تو نیا مینڈیٹ 5 سال کیلئے ہو گا۔ الیکشن کمیشن نے کہا ہے کہ قومی و صوبائی اسمبلیوں کا الیکشن ایک تاریخ پر کرانا آئینی تقاضہ نہیں، اسمبلی تحلیل ہونے کی صورت میں پوری اسمبلی کا انتخاب ضمنی الیکشن نہیں ہوتا۔الیکشن کمیشن نے مزید کہا کہ قومی اسمبلی میں استعفے منظور ہوئے تو ضمنی انتخاب ہو گا، اسمبلیاں تحلیل ہوئیں تو 90 روز میں الیکشن کرانے ہوں گے۔ 90 روز میں انتخابات کرانا آئینی تقاضہ ہے۔

23 دسمبرکو اسمبلیاں تحلیل ہوں گی یا نہیں یا پھر کوئی نئی تاریخ منظر عام پرآئے گی۔اس کے لئےتو انتظار کرنا پڑے گا۔ تاہم یہ ضرور ہے کہ اگلے تین چار رو ز سیاسی ملاقاتوںکے حوالے سے بہت اہم ہیں اورجوڑ توڑ کے ماہرین نے بھی اسمبلیوں کی تحلیل کوروکنے کے ـحوالے سےکمر کس لی ہے۔بقول آصف علی زرداری کے’’ویٹ اینڈ سی‘‘ کی پالیسی کے بعد ہی کوئی نتیجہ سامنے آئے گا۔

نوٹ : یہ بلاگر کی ذاتی رائے ہے اس سے ہمارا متفق ہونا ضروری نہیں ہے

محمد نویداسلم سینئرصحافی ہیں ،روزنامہ خبریں،نیا اخبار،صحافت ،دوپہر، روزنامہ وقت (جنگ گروپ ) کے ساتھ وابستہ رہے۔ نوائے درویش سمیت مختلف ویب سائیٹس کے لئے بلاگنگ کررہے ہیں،حالات حاضرہ ،شوبز،سپورٹس سمیت دیگر امور پرگہری نظر رکھتے ہیں۔

نوائے درویش