بھارت میں مسافر طیارہ لینڈنگ کے دوران 2 ٹکڑے ہوگیا، 16 افراد ہلاک
کیرالہ( نوائے درویش رپورٹ)بھارت کی جنوبی ریاست کیرالہ میں قومی فضائی کمپنی ائیر انڈیا کا مسافر طیارہ لینڈنگ کے دوران 35 فٹ نیچے گرکر دو ٹکڑے ہوگیا جس کے نتیجے میں کم از کم 16 مسافر ہلاک ہوگئے۔
ایئرنڈیا کی دبئی سے آنے والی پرواز میں عملے کے ارکان سمیت 191 مسافر سوار تھے، طیارہ لینڈنگ کے دوران کیرالہ کے کالی کٹ ایئرپورٹ پر پھسل گیا۔بھارتی میڈیا رپورٹس کے مطابق مسافر طیارہ رن وے سے پھسل کر 35 فٹ نیچے وادی میں گرکر دو ٹکڑے ہوگیا جس کے نتیجے میں جہاز کے کپتان اور معاون پائلٹ سمیت 16 افراد ہلاک ہوگئے۔واقعے میں 80 سے زائد افراد زخمی ہوئے ہیں جنہیں مختلف اسپتالوں میں منتقل کردیا گیا ہے جب کہ حادثے کے مقام پر امدادی کارروائیاں جاری ہیں۔
بھارتی سول ایوی ایشن کی جانب سے جاری بیان میں کہاگیا ہے کہ طیارہ لینڈنگ کے دوران پھسل کر دیوار توڑتا ہوا 35 فٹ نیچے جاگرا اور گرکر دو ٹکڑے ہوگیا جب کہ جہاز میں 174 مسافر، 10 نوزائیدہ بچے، 5 عملے کے ارکان اور 2 پائلٹ سوار تھے۔حکام نے بتایا کہ خوش قسمتی سے حادثے کے دوران جہاز میں آتشزدگی نہیں ہوئی ۔
No comments:
Post a Comment