اوکاڑہ میں گل ادبی ایوارڈز کی تقریب، معروف شعرا کو خراجِ تحسین
وکاڑہ (ادبی رپورٹر) ترویج ادب پاکستان اور گل ادبی فاؤنڈیشن کے اشتراک سے سن 2024 میں شائع ہونے والی اردو اور پنجابی شاعری کی کتب کا ملک گیر سطح پر مقابلہ منعقد کیا گیا۔ منتخب شعرا کو "گل ادبی ایوارڈ" سے نوازا گیا۔
تقریب تقسیمِ ایوارڈ اوکاڑہ ڈسٹرکٹ بار کی لائبریری میں منعقد ہوئی، جس کی صدارت ریٹائرڈ سیشن جج اصغر فہیم بھٹی نے کی، جب کہ پروفیسر احمد ساقی اور طارق کامران مہمانانِ خصوصی کے طور پر شریک تھے۔ صغیر تبسم اور میاں سجاد وٹو کو مہمانانِ اعزاز کے طور پر مدعو کیا گیا۔ سٹیج سیکرٹری کے فرائض اصغر ندیم نے انجام دیے۔
تقریب میں ایک خوبصورت مشاعرہ بھی منعقد ہوا، جس میں معروف شعرا نے اپنا کلام پیش کیا اور حاضرین سے خوب داد سمیٹی۔ مشاعرے کے بعد ایوارڈز کی تقسیم عمل میں لائی گئی۔
گل ادبی فاؤنڈیشن کے بانی و چیئرمین چوہدری افضل گل نے اپنے خطاب میں بتایا کہ گل ادبی ایوارڈ ان کے والد، چوہدری محمد چراغ گل کے نام سے منسوب ہے، جو علم دوست اور ادب نواز شخصیت تھے۔
صدرِ محفل اصغر فہیم بھٹی نے اپنے خطاب میں اس ادبی اقدام کو سراہتے ہوئے کہا کہ ایوارڈ کا اجراء ادب کی خدمت کے مترادف ہے اور اس حوالے سے چوہدری افضل گل اور ترویج ادب پاکستان کی کوششیں قابلِ تحسین ہیں۔
ایوارڈز حاصل کرنے والوں میں نمایاں نام یہ ہیں:
ڈاکٹر بشیر فیض اسدی، چوہدری محمد اختر گل (پرنسپل اے پی ایس کالج)، شاذیہ اکرم نایاب، سہیل اسجد، صغیر تبسم، املاک جدران، عروا بن سہیل، طاہر نعیم، خضر محسن، ڈاکٹر انور انیق، ناز مظفر آبادی، پروفیسر رضا اللہ حیدر، ڈاکٹر انعم گل، احمد ظفر، چوہدری صاحب افضل گل، چوہدری ہاتف افضل گل اور عمران حسینی۔
No comments:
Post a Comment