’’ساڈے ورھیاں دا لہور ‘‘،تقریب میں شرکاء نے پاک ٹی ہاؤ کی یادیں تازہ کیں

کلچرل ٹریژرز کے اجلاس کے صدرپرویز کلیم اورمہمان خصوصی سید حفیظ،امجد طفیل اور راجہ ریاض تھے، شہزاد فراموش ، عباد نبیل شاد، سید ساجد یزدانی نے بھی گفتگو کی ، آفتاب خان اور ثنا بتول سٹیج سیکرٹری تھے

لاہور(نوائے درویش رپورٹ )کلچرل ٹریژرز فاؤنڈیشن کے زیر اہتمام’’ ساڈھے ورھیاں دا لہور‘‘میں ایک تقریب پاک ٹی ہاؤس کی یادیں کے عنوان سے اسی تاریخی جگہ رکھی گئی جس کی صدارت پرویز کلیم نے کی ۔مہمانان خصوصی میں سید احمد حفیظ‘ڈاکٹر امجد طفیل اور راجہ ریاض احمد خان شامل تھے۔ نظامت کے فرائض آفتاب احمد خان اور ثنا بتول نے انجام دیئے۔

شہزاد فراموش نے حلقہ ارباب ذوق اور پاک ٹی ہاؤس کو لازم و ملزوم قرار دیتے ہوئے بتایا کہ دور طالب علمی میں انہوں نے نوے کی دہائی سے یہاں آنا شروع کیا پھر اپنی تنظیم کے تحت تقریبات بھی یہاں منعقد کیں اور بتایا کہ کیسے اس کو بند کیا گیا اور کیسے دوبارہ کھلا ۔میجر ساجدنے بھی اپنی یادیں شئیر کیں۔ ڈاکٹر عباد نبیل شاد نے بتایا کہ وہ کوائے ایم سی اے میں بھی اجلاس کرتے رہے ہیں اور یہ عمارت بھی اسی کا حصہ ہے ۔صحافی سید ساجد یزدانی نے بتایا کہ وہ اپنے والد یزدانی جالندھری کے ساتھ بچپن میں آیا کرتے تھے پھر ان کے بھائی حامد یزدانی یہاں لگاتار آتے رہے اور پورا گھرانہ ہی ادبی ماحول میں رنگ گیا ۔

انہوں نے پاک ٹی ہاؤس میں غیر ادبی لوگوں کی آمد اور کھانے پینے کی ہوش ربا قیمتوں پر تشویش کا اظہار کیا اور کہا کہ حکومت کو ادیبوں شاعروں کیلئے سبسڈی دینا چاہئے بعدازاں قیمتوں کے حوالے سے قرار دیاد بھی منظور کی گئی ۔چیئرمین کلچرل ٹریژرز راجہ ریاض احمد خان نے بتایا کہ وہ یہ طالب علمی کے دور میں آتے تھے پھر یہاں سےغائب ہو گئے اور اب یہاں تقریبات منغقد کرواتے ہیں ۔ڈاکٹر امجد طفیل جو کہ حلقہ ارباب ذوق کے یہاں سیکرٹری بھی رہے انہوں نے تفصیل کے ساتھ گفتگو کی اور پاک ٹی ہاؤس کے مدوجذر پر کھل کر بات کی ۔ سید احمدحفیظ نے کہا کہ ایسی تاریحی جگہوں پر محافل کا انعقاد یقینا قابل ستائش ہے۔

صاحب صدارت پرویز کلیم نے بتایا کہ انہوں نے یہاں اپنے استاد عارف عبدالمتین کی وجہ سے آنا شروع کیا تھا اور وہ اپنے بڑوں کی باتیں بہت دھیان سے سنا کرتے تھے۔ایم آر رانا ‘ میجر ساجد‘ منیر پسروری ‘ ندیم عباس ‘حنا بتول ‘ تبسم اور دیگر شریک ہوئے ۔