’دلا ٹھہرجا یار دا نظارا لین دے‘‘
منیر حسین نے پاکستانی فلمی صنعت کے زمانہ عروج میں کئی لازوال گیت ریکارڈ کروائے
کتنے ہی شیریں اور میٹھے بول منیر حسین کی مدھر آواز میں جاوداں ہوگئے۔ اس گلوکار نے پاکستانی فلمی صنعت کے زمانہ عروج میں کئی لازوال گیت ریکارڈ کروائے جو آج بھی سماعتوں میں رَس گھول رہے ہیں۔27 ستمبر 1995 کو پاکستان کے اس نام ور گلوکار نے لاہور میں زندگی کا سفر تمام کیا تھا۔ آج منیر حسین کی برسی ہے۔
قیامِ پاکستان سے قبل آنکھ کھولنے والے منیر حسین نے تقسیم کے بعد پاکستان کی فلم انڈسٹری میںگلوکار کی حیثیت سے نام و مقام بنایا۔ وہ فن موسیقی کے دلدادہ اور ماہر گھرانے میں پیدا ہوئے تھے اور یوں سر اور ساز سے ان کی محبت فطری تھی فلم نگری میںموسیقار صفدر حسین نے ان کی آواز میں ’’حاتم‘‘ کا ایک ریکارڈ کروایا جس کے بعد نام ور موسیقار اور فلم ساز منیر حسین کی طرف متوجہ ہوئے۔
مشہور موسیقار رشید عطرے، خواجہ خورشید انور اور اے حمید نے منیر حسین کو فلمی دنیا میں گلوکاری کا موقع دیا اور ان کی شہرت کا سبب بنے۔ فلم ’’سات لاکھ‘‘ کے لیے رشید عطرے کی موسیقی میں منیر حسین نے ’’قرار لوٹنے والے قرار کو ترسے‘‘ جیسا مقبول گیت گایا جب کہ فلم ’’شہید ‘‘کا مشہور نغمہ ’’نثار میں تری گلیوں پہ‘‘،’’ دکھڑا ‘‘کے لیے ’’دلا ٹھہرجا یار دا نظارا لین دے‘‘ جیسے مقبولِعام گیت کو بھی منیر حسین نے اپنی آواز دے کر گویا امر کردیا۔
منیر حسین نے پاکستانی فلموں کے لیے اردو اور پنجابی زبانوں میں جو گیت ریکارڈ کروائے وہ سبھی یادگار ثابت ہوئے اور فلم انڈسٹری میں انھیں بہت سراہا گیا۔ پاکستان کے اس معروف گلوکار کو لاہور کے مومن پورہ کے قبرستان میں سپردِ خاک کیا گیا۔
No comments:
Post a Comment