امن مذاکرات کیلئے کابل پہنچ گئے
کابل(مانیٹرنگ ڈیسک) طالبان کے ساتھ مذاکرات کی قیادت کرنے والے امریکا کے نمائندہ خصوصی زلمے خلیل زاد امن مذاکرات و معاہدے کے لیے کابل پہنچ گئے۔واضح رہے کہ واشنگٹن اور طالبان کے درمیان ممکنہ معاہدے پر بات چیت جاری ہے جس کے تحت امریکی فوج کا حفاظتی ضمانتوں کے بدلے افغانستان سے انخلا ہونا ہے۔تاہم حالیہ ہفتوں میں امریکا مذاکرات کے حوالے سے خاموش نظر آرہا ہے۔
افغان صدر کے ترجمان کے مطابق امریکا کے نمائندہ خصوصی برائے افغان مصالحتی عمل زلمے خلیل زاد نے افغان صدر اشرف غنی سے ملاقات کی۔صدارتی محل سے جاری بیان کے مطابق امریکی سفیر نے اشرف غنی کو بتایا کہ طالبان کے ساتھ مذاکرات میں کوئی اہم پیش رفت نہیں ہوئی مگر وہ طالبان سے تنازع کو کم کرنے کے حوالے سے اتفاق رائے پر پہنچ جائیں گے تاہم انہوں نے اس میں کتنا وقت لگے گا یہ نہیں بتایا۔
زلمے خلیل زاد نے دورہ افغانستان سے قبل پاکستان کا دورہ کیا تھا اور اس دوران انہوں نے وزیر خارجہ شاہ محمود قریشی اور آرمی چیف جنرل قمر جاوید باجوہ سمیت متعدد حکام سے ملاقاتیں کی تھیں۔اسلام آباد نے قطر میں طالبان اور واشنگٹن کے درمیان گزشتہ ایک سال سے جاری مذاکرات میں سہولت کار کا کردار ادا کیا ہے۔
No comments:
Post a Comment