پولیو مہم کے 3 دن میں ہدف کا 85 فیصد حاصل
اسلام آباد(نوائے درویش) ملک بھر میں قومی انسداد پولیو مہم کے 3 دن میں ہدف کا 85 فیصد حاصل کرلیا گیا ، مہم میں 4 کروڑ 16 لاکھ بچوں کی ویکسینیشن کا ہدف رکھا گیا ہے۔
ملک بھر میں قومی انسداد پولیو مہم کامیابی سے جاری ہے، قومی انسداد پولیو مہم کے 3 دن میں ہدف کا 85 فیصد حاصل کرلیا گیا ، دو روز میں 3کروڑ 40 لاکھ 50 ہزار بچوں کی ویکسی نیشن ہو چکی ہے۔ذرائع کا کہنا ہے کہ قومی انسدادپولیو مہم میں 4 کروڑ 16 لاکھ بچوں کی ویکسینیشن کا ہدف رکھاگیاہے، گلگت بلتستان میں 2لاکھ 20 ہزار 568بچوں ، آزادکشمیر میں 6لاکھ34ہزار633بچوں کی ویکسی نیشن مکمل کرلی گئی ہے۔
پنجاب میں ایک کروڑ 82 لاکھ 61 ہزار بچوں ، اسلام آباد میں 2لاکھ68ہزار139بچوں ، سندھ میں 74 لاکھ 8 ہزار بچوں کی پولیو ویکسی نیشن کر لی گئی۔اسی طرح خیبرپختونخوا میں 57 لاکھ 2 ہزار بچوں اور بلوچستان میں 15لاکھ55ہزار489بچوں کو پولیو کے قطرے پلائے گئے۔
ملک گیرقومی انسداد پولیو مہم کل تک جاری رہے گی، قومی انسداد پولیو مہم کے بقیہ دو دن کیچ اپ ڈیز ہیں۔خیال رہے قومی انسداد پولیو مہم کا چوتھا روز ہے ، رضا کار گھر گھر جا کر بچوں کو پولیو سے بچاؤ کے قطرے پلا رہے ہیں۔کراچی میں گڈاپ،بلدیہ،اورنگی،لیاقت آباد اورسائٹ ٹاؤن سمیت آٹھ یوسیزمیں بائیس لاکھ بچوں کو پولیوسے بچاؤ کے قطرے پلائے جا رہے ہیں جبکہ لاہورمیں اب تک دس لاکھ اسی ہزارسے زائد بچوں کو پولیو سے بچاؤ کے قطرے پلائے جاچکے ہیں۔
بلوچستان میں چارروزہ مہم کے دوران تینتیس اضلاع میں پچیس لاکھ بچوں کو ویکسین پلائی جائے گی جبکہ پشاورسمیت خیبر پختو نخوا میں پینسٹھ لاکھ سے زائد بچوں کوانسداد پولیوکے قطرے پلانے کا ہدف ہے۔
No comments:
Post a Comment